Elkartea #ustebainogehiagogirelako #leuskaraavecplaisir
Mintzalasai elkartearen zenbait berri
Gutun publiko batean elkartearen aurtengo jarduerari buruzko informazioa helarazi dugu.
2020eko Ekainaren 2a | ± 02min 48s
Joan den apirilaren 20an, Bulegoko kideak bideokonferentzia batean bildu ziren 2020ko proiektuen inguruan gogoetatzeko. Egoeraren irakurketa bat egin ondotik, erabaki dugu ahal dugun guzia egitea gure 3 tresnak garatzeko (Besta Euskaraz kita – hiztegi informalak – webgunea) eta 3 gertakariak mantentzeko (Mintzalasai *festibala - *euskaltegietan – *ikastetxeetan).
Nahiz eta proiektu horien formatua oraindik ez dugun definitu, horra egutegia:
Irailak 21-27: Mintzalasai *festibala
Euskara deskubritzeko eta erabiltzeko hitzordu sorta. Zuetariko bakoitzak egindako proposamenei esker, egun bakoitzak ardatz tematiko bat izanen du. Momentu azkarrak irailaren 26ko Hizkuntzen Europako eguna eta irailaren 27ko Marion aintzirako besta berritua izanen dira.
Urriak 1-15: Mintzalasai *ikastetxeetan
Baiona, Angelu eta Miarritzeko eskola elebidunetako ikasleentzako aktibitateak.
Azaroa: Mintzalasai *euskaltegietan
Baiona, Angelu eta Miarritzen euskara ikasten duten 600 heldurentzako aktibitateak.
Bere tresna eta gertakarien bidez, Mintzalasai elkarteak osagarria izan nahi luke zuek terrenoan egiten duzuen lanarekiko. Aurten bereziki, zuen igurikatzeei erantzun nahi genieke, eta baita hiztunen beharrei ere: hiri eremuan heldulekuak eskas dituzten hiztunak, haur euskaldunen gurasoak, euskara ikasten duten helduak, hizkuntzaren ikuspegitik urrunago joan nahi luketen egiturak…
Zuekin batera, Mintzalasaiek eremu partekatu bat izaten segituko du. Helduden asteetan, parte hartzeko deialdi bat hedatuko dizuegu Baiona, Angelu eta Miarritzeko egitura eta euskaltzale guziei; ondotik, elkarrekin egitarau ausart eta berritzaile bat sortzeko, gaur egungo beharrei erantzungo diena.
Gogorra izanen den krisi honek, pertsona zaurgarrienei eraginen die lehenik. Guk sinesten dugu euskararen alde deus ez egitea, desagertzen uztea dela. Beraz, garrantzitsua iruditzen zaigu lanean segitzea.
Gogo horrek eraman gaitu “Etxean Euskaraz” kanpaina sortzera, konfinamenduaren lehen egunetik. 8 astez, gure sareak hedatu ditugu eta komunikatzeko modu berriak baliatu ditugu jendea eta euskara elkarrekin konektatzeko.
Besteak beste, 60 artikulu argitaratu ditugu webgunean, 28.000 bisita izan ditugu –horietatik 16.000 berri– eta 59.000 orrialde bisitatuak izan dira.
Bistan da, gaur gogoan ditugu egoera biziki zailean diren elkarte eta aktibistak. Mezu honen bidez gure atxikimendua eta sustengua helarazi nahi diegu. 2012tik, gure helburua izan da euskararen biziberritzearen alde konkretuki lan egin nahi duen jendea elkartzea, eta hiri eremu honetan ere euskaraz bizitzeko gogoa badela erakustea. Zentzu horretan aitzinatzera engaiatzen gira.
Kolektiboaren indarrarekin eta aitzina segitzeko borondatearekin, egoera honek indartsuago eginen gaituela sinesten dugu.
Gora bihotzak!