Pantailak euskaraz dinamikak euskararen presentzia emendatu nahi du ikus-entzunezkoetan
Pantailak Euskaraz ikus-entzunezkoen mundu pantaila-anitzean euskarak duen presentzia eskasarekin arduraturik diren hainbat herri ekimen eta eragilek sortutako mugimendua da. Problematika hori mahai gainera ekartzea lortu dute, batez ere Hego Euskal Herrian. Jadanik, Amazon prime video eta Netflix engaiatu dira euskarazko eduki gehiago hedatzera.
2022ko Apirilaren 4a | | ± 01min 17s
"Ikus-entzunezkoak gure hizkuntzan jasotzeko eskubidea"
"Geroz eta anitz eta zabalagoa den ikus-entzunezkoen munduan euskararen presentzia gero eta txikiagoa dela ikusita, eta egoera honek euskaldunon orainean eta, batez ere, etorkizunean izan ditzakeen ondorio konponezinekin arduraturik, gure hizkuntzan bizi ahal izango garen etorkizun bat ziurtatzeko beharrezkoak diren neurriak" proposatu dituzte manifestua sustatu duten eragileek, gogoratuz indarrean dagoen legediak aipatzen dituela "ikus-entzunezkoak gure hizkuntzan jasotzeko herritarrok dugun eskubidea eta erakundeek hau bermatzeko duten betebeharra".
Neurrien artean, euskal sorkuntzaren finantzaketa publikoa, euskarazko streaming plataforma baten sortzea edo euskarari gutxieneko kuotak ezartzea proposatu dituzte.
Aitzinamenduak
Ildo horretatik, straming plataforma batzuk iragarri dute zenbait eduki hizkuntza gutxituetan eskainiko dituztela. Adibidez, Netflix plataformak erran du euskararen, katalanaren eta galegoaren presentzia sustatuko duela 2022ko katalogoan, eta urtea amaitzen denerako 70 titulu ikusi ahalko direla plataforman euskaraz, galegoz, eta katalanez. Baina horrek Espainiar Estatuko netflixentzat soilik balio du, beraz momentuko, Ipar Euskal Herrian ez da kasua izanen.
Dinamikaren berriak segitzeko: https://www.pantailakeuskaraz.eus/