2022, Hitza eta ekimena indartzeko urtea
Azken bi urteetan kolpe gogorrak jaso ditu euskalgintzak ere: ekimen gibelatuak, ezeztatuak, mugatuak… Hala ere, datorren urteari itxaropentsu begiratzen diogu euskaltzaleek, bi ekimen garrantzitsu izanen baititugu: Korrika eta Euskaraldia.
2021eko Abenduaren 10a | | ± 02min 05s
Hitza eta ekimena indartzeko urtea
Euskararen mugimenduetan, azken urteetan zabaldu da hitzetatik ekintzetara jauzia egiteko beharra, euskararen alde egotetik alde egitera, konpromisoak hartzera.
Horretarako aukera bikaina eskainiko digu datorren urteak, Korrikan parte hartuz, kilometroak erosiz, korrika kulturala antolatuz, Euskaraldian ahobizi edo belarriprest txapa jantziz, gure herrian ariguneak sortuz eta ekimen hauek antolatzeko batzordeetan eraginez.
Pandemiak eta azken hilabeteetan izandako euskararen aurkako erasoek oroitarazi digute orain arte irabazitakoa gal dezakegula eta euskara garatzen segitu beharko dugula, hats berri batekin.
Euskaraldiaren eta Korrikaren antolatzaileek 2022a euskararen urtea izatea lortu nahi dute, aro berri baterako abiapuntua. Hitzekin dio 22. Korrikaren leloak, eta Hitzez ekiteko garaia 3. Euskaraldiarenak.
Bi ekimenen antolatzaileek argi dute 2022a hitzaren eta ekintzaren urtea izango dela.
Korrikaren 22. Edizioa
2022ko martxoaren 31tik apirilaren 10era ibiliko da lekukoa eskuz esku Amurriotik Donostiara “Hitzekin” lemapean. 11 egun izango dira, eta 2.500 kilometro inguru. Azken egunean, Donostian jakinen da aurtengo Korrikaren mezua, lekuko barnean milaka kilometro egin dituena.
Bestalde, Pirritx, Porrotx eta Marimotots pailazoak omenduko dituzte, "34 urteko ibilbidean adierazi duten konpromisoagatik eta ekinagatik; eta orainaldiari eta etorkizunari begira dauden eragileak direlako".
Euskaraldiaren 3. Edizioa
2022ko azaroaren 18tik abenduaren 2ra iraganen da eta proposamen berriak eginen dizkie ahobizi eta belarriprestei beren hizkuntza ohiturak alda ditzaten. Bestalde, ariguneen kontzeptua finkatzeko urtea izanen da ere.
“Hitzez ekiteko garaia” izanen da leloa. Harreman sozialak mugatuta egon dira hilabeteetan, eta hizkuntza ohituren aldaketan jauzi berri bat emateko hitza eta ekintza uztartzeko beharra azpimarratu nahi dute. Hitzaren bidez eragiteko deia egiten zaie herritar eta entitateei, hitza baita hizkuntza ohiturak aldatu eta inertziak apurtzeko tresna nagusia.
