2021eko Otsailaren 2a | CC INAKI ZUGASTI | | ± 01min 56s

Besteak beste, kultura da elkarren arteko loturak josten dituena eta euskara gaur egun bizi bada, neurri handi batean kulturari esker ere bada.

Kulturak hizkuntza elikatzen eta gaurkotzen du.

Duela urte bat, konfinamendu garaian, euskal kultur eragile anitzek bi eguneko greba digital bat egin zuten eta ondorioz, 2020ko apirilaren 21 eta 22an ez zuten kultur edukirik partekatu sareetan. Haien aldarrikapen testuan galdetzen zuten: "Zer gertatuko litzateke aktorerik, bertsolaririk, dantzaririk, idazlerik, eskultorerik, gidoilaririk, komikilaririk, musikaririk, margolaririk, zinemagilerik ez balego? Zer jendarte genuke antzokirik, liburutegirik... kulturgunerik gabe? Nola antolatuko genuke hezkuntza sistema sortzailerik gabe?"

Nahiz eta Ihauteri garai hauetan zirtzilek, kaskarotek eta dantzariek gure herrietako plaza batzuk berpiztu dituzten, oraindik ere zaila zaigu kultur ekitaldietan presentzialki parte hartzea; zinemarik, kontzerturik, antzerkirik… gabe segitzen dugu. Horregatik, hilabete honetan euskarazko kulturaz etxetik gozatzeko bide batzuk proposatu nahi dizkizugu. Jakinez, egoera honetatik ateratzean, berriz plazetan, festibaletan, hitzaldietan eta liburu-dendetan ikusiko garela; kultura gozagarriago baita pantailetatik kanpo.

Hasteko, hona euskal kultura bere orokortasunean aurkezten duten atari zenbait:

• Euskal Kultur Erakundearen webgune aberatsean, kultur agendaz gain, euskal artisten elkarrizketa sakonak eta arte adierazpideei buruzko fitxa tematikoak irakur daitezke: https://www.eke.eus/eu
• Kultursharea atarian, Euskal Herri osoko kultur aktualitatea segi daiteke euskaraz: https://kultursharea.eus/
• Frantsesezko webgune orokor bat aipatzekotan, Baskulture ataria dugu: https://www.baskulture.com/home
• Azkenik, Etxepare Institutuaren webgunean ere, kultur adierazpide bakoitzari dagokion fitxa irakur dezakegu (antzerkia, musika klasikoa, arkitektura…): https://www.etxepare.eus/eu/euskal-kultura