2021eko Otsailaren 3a | | ± 01 min 08 s

Elkartasun balore mezulari eta harreman sortzaile, Santa Agate tradizio herrikoia da eta 30 urte baino gehiago egiten du Arrokak Biarritzen mantentzen duela. Hirian, karrikaz karrika pasatzen da, kantatuz, kantuak eskainiz harrera goxo baten truke.

Santa Agate Txikik balore eta tradizio hauek mantentzen ditu eta Hiriko lehen mailako eskola elebidunei trasmititzen. Aurten ere, Arroka eta Bertsularien Lagunak elkarteetako kideak Paul Bert, Reptou, Sainte Marie eskoletan eta Itsas Argi ikastolan izan dira hirugarren zikloko haurrei kantuak eta bertsoak transmititzen.

Osasun egoeraren ondorioz, aurtengo Santa Agate Txiki desberdina izan da. Haurrek ezin izan dute Miarritzeko karriketan desfilatuz kantatu, baina eskoletan ospatu dute. Elkarteetako ordezkarien eta musikarien laguntzaz, ikasitako kantu eta bertsoak partekatu dituzte eta trukean, opariak eta krakada errezibitu dute.

Tradizioz beteriko egun honek parada ematen die euskaraz ikasten duten haurrei, hizkuntza ikasgelatik kanpo erabiltzeko eta momentu goxo bat pasatzeko.