2021eko Azaroaren 4a | | ± 01 min 39 s

Iparra-Hegoa elkarteak bultzaturik, Kutxa bira ekimenak bere hegalaldia martxoaren 20an hartu zuen bi hilabeteko itzuli oparoa egiteko. Argentinatik Baionara, Xiberotik Frantziako Réaux presondegira, Ipar Euskal Herritik Bartzelonara eta Hego Aldera, 70ez goiti ongi etorri egin zioten kutxari, aldi oro herritarrek euskararentzat eta Euskal Herriarentzat dituzten ametsak sartuz ontzian.

Orain, Kutxa biraren bidaia kontatzen duen dokumentala ikusten ahal da: https://kanaldude.eus/bideoak/4953-dok-kutxabira-herriz-herri-euskara-oinarri

Sinopsia:

Aurkezten dizuegun dokumentala auzolan ero baten istorioa da, musukoen gainetik arnastu nahi izan duen herri batena. Pandemia baten erdian ekimenak egitea posible zela erakusten digu lanak, itxiera perimetrala eta mugen itxieraren gainetik herri ezberdinak eta euskal diaspora elkartu dituen ekimena kontatzen digu. Egoera larri eta krisien aitzinean hemen nork agintzen duen erakutsi nahi izan digute frantziar eta espainiar estatuek. Bada guk erakutsi diegu hemen euskaraz bizi nahi duen herri bat badela, bere lurrari atxikia eta haien inposaketen gainetik ari dena. Lege babesik gabe eta legearen kontra ikastolak altsatu ziren, gure hizkuntzaren alde gau ta egun lekuko bat ibiltzen da Euskal Herria zeharkatzen, hedabide euskaldunak sortu dira herritik, eta kutxa batek COVID-19 garain mundua zeharkatu zuen euskaldunon ametsak bilduz, bere xumetasunean ekimen haundi baten istorioa ikustera gonbidatzen zaituztegu.

Dokumentalaren egileak: Amaia Renobales, Iban Garzia