Zorionak Mizanbu!
Abenduaren 18an, Mizanbu gaztetxeko kideek elkartearen 20. urtebetetzea ospatuko dute. Belaunaldiarteko egun bat antolatu du gaur egungo gazte asanbladak, garaiko gaztetxearen sortzaileekin batera. Goizean, haurrentzako herri jokoak eta skate-aldi bat izanen dira. Ondotik bazkaria, txaranga eta kontzertuak: Andoni Oilokiegi, Bho, Urtz eta Kalabass DJ.
2021eko Abenduaren 15a | | ± 01 min 30 s
20 urteak ospatzea
Gaur egungo gazte taldearentzat urteurrena markatzea garrantzitsua da, parada ematen dielako Mizanbutik pasa diren belaunaldi ezberdinak elkartzeko eta harremanak sortzeko. Gaztetxea sortu zelarik haurrak ziren eta orain, lekukoa hartu dute toki hori biziarazteko. Helburuak ez dira anitz aldatu: euskal kultura eta euskara Biarritzeko gazteen artean hedatzea, erakustea gazte euskaldunak badirela?
Horretarako, pala, pilota eta mus txapelketak antolatzen dituzte bestelako aktibitateen artean. Ideiarik ez zaie falta: dantza, antzerkia, mintzapraktika? Kontziente dira euskarari interesatzen diren gazte anitz badirela Biarritzen baina askotan, ez dakite xuxen non eta norekin erabiliko duten hizkuntza AEK-ren ikastaldietan ikasi ondotik. Gaztetxeari esker, euskaldun berri anitzek euskara erabil dezakete aktibitate ezberdinen inguruan.
Asmo eta behar berriak
Hurrengo urtea emankorra dela aitzinatu digute: Korrika izanen da, ihauteriak, Biarritzeko bestak eta festilasai. Gaztetxekoen asmoa da gertakari horietan parte hartzea, zerbait ederra proposatuz.
Gaztetxeen errola gazteen problematikak lantzea ere bada. Mizanbuko kideek arazo nagusi bat ikusten dute gure hirian: etxebizitzaren arazoagatik eta espekulazioagatik, geroz eta gazte gutxiago bizi daitezke Biarritzen. Horren parean, gaztetxeak gizarte nahasketarako eta gazteen arteko harreman sozialak sustatzeko tokia izan nahi luke.
Info+: https://www.facebook.com/mizanbu.gaztetxea
