2019ko Irailaren 1a | ± 01 min 55 s

Etorkizuneko aukera

Aldi berean, euskalgintzen lanari esker, 21. mende huntan euskara oraindik errealitate bat da lurralde urbanizatu honetan: 15.800 hiztun, 550 heldu euskaldungai, 2.450 haur eta gazte ama-eskolatik unibertsitatera, 60 nini haurtzaindegietan, hamarnaka egitura Bai euskarari ziurtagiriarekin?

BABn ere, uste baino gehiago gira: hortaz jabetu gaitezen okindegira sartzean, autobusera igotzean, administrazioko harreran, haur parkean, ezezagun batekin harremanetan sartzerakoan? Aska ditzagun korapiloak! Astindu ditzagun inertziak! Has gaitezen euskara beti eta denekin partekatzen. Irria ezpainetan, lasai baina ozen.

Bateratu & Boteretu

Euskaraldiarekin, ariketa sozial berritzailea egin dugu Euskal Herri osoan. Korrikarekin, euskaltzaletasuna aldarrikatu dugu eskuz esku 2000 kilometrotan. Seaskarekin mende erdiko lana eta borroka ospatu ditugu. Eta ez da fini! Etorkizuneko hizkuntza politika publikoak gure mobilizazioen araberakoak izango dira. Kolektiboki mobiliza gaitezen beraz, eta indibidualki alda ditzagun gure hizkuntza ohiturak.

Bizi dugun egoera diglosikoa iraultzeko, eredu berriak asmatu beharko ditugu elkarrekin. Euskara norma eta inklusiorako giltza izango diren espazioak, garaiak, aukerak, ohiturak. Sortzaileak eta ausartak izan beharko gira, euskararen inguruko kontsentsu soziala ez baita hautsiko errebeldeegiak izan girelako, kontrakoak gu baino antolatuagoak izango direlako baizik. Izan gaitezen pixkor, baikor eta burugogor!

Bitartean, sartze garai honetan Mintzalasai itzultzen zaigu BAM osora. Irailaren 23tik 29rat, euskara praktikatu eta deskubritzeko 45 aukera izanen ditugu 30 eragileren parte hartzeari esker. Aurten lehen aldiz instituzio publiko guzien sustenguarekin konda dezakegu gainera eta eskertzekoa da! Belaunaldi artekoa, berritzailea, aldarrikatzailea, kalitatezkoa, bateratzailea? Mintzalasai festibalaren egitaraua, urte osoko eskaintzaren erakusleihoa besterik ez da. Aukerak ez dira falta.

Euskaraz bizi, euskaraz goza!