2020eko Martxoaren 11a | ± 02 min 12 s

Topaketa hauetan, 80 gazte akademiko, ekintzaile eta artista biltzea da helburua, hizkuntza gutxituen biziberritzeari begira sare bat sortzeko. Aitzineko edizioak 2011 eta 2018an izan ziren eta aurtengoa irailaren 6tik 9ra iraganen da.

Testuingurua

Hizkuntza asko daude munduan, baina denek ez dute bermatuta beraien biziraupena. Gobernuen politikez gain, funtsezkoa da herri ekimenetatik abiatutako lana munduko hizkuntza gutxituen alde. Zentzu horretan, gazteria izango da hizkuntza gutxituen biziberritzea ahalbidetuko duen gizarte-taldea. Globalizazio garai hauetan horrelako erronka bati erantzuteko, hizkuntza gutxituetako komunitate ezberdinetako kideen arteko elkartasun eta elkarlana funtsezkoak izango dira etorkizunean.

Zer egingo da HIGAn?

EHUko Udako Ikastaro Ofiziala izan arren, ez da ekimen akademiko hutsa izango, edo ez behintzat bere osotasunean. Era guztietako jarduerak antolatu dira soziolinguistikan parte hartzen dutenak trebatzeko, etorkizunari begira sareak ehuntzeko eta gazteria hain garrantzitsua den gai honetan aktibatzeko. Arrtsaldean, elkarrekin ezagutzeko eta bizitza kulturala egiteko aukera egongo da.

Erabiliko den hizkuntza euskara izango da bereziki, baina gaztelania eta ingelerara itzuliko da aldi bereko interpretazio zerbitzuaren bitartez, baita Gaztelaniazko Zeinu Hizkuntzara ere beharrik balego. Horretaz gain, ekintzaile guztien arteko elkar ezagutza bermatzeko neurriak hartuko dira.

Gazteentzako esperientzia aberasgarria izan dadin eta atzerritik ekintzaileak erakarri ahal izateko, antolakuntzak matrikula, lo egiteko tokia, gosaria eta bazkariak ordainduko dizkie aukeratutako gazteei. Izan ere, parte-hartzaileen arteko aniztasuna egon dadin, eskaerak jaso ondoren antolakuntzak erabakiko du zeintzuk gonbidatuko dituen ordainduta, irizpideak: hizkuntza-komunitate ahalik eta gehien egotea eta perfil ezberdinetako jendea egotea direlarik.

Izen emateak maiatzaren 21era arte: https://www.vitoria-gasteiz.org/j31-01w/formularioViewer/create?formularioId=352

Informazio gehiago: https://www.vitoria-gasteiz.org/wb021/was/contenidoAction.do?lang=eu&locale=eu&idioma=eu&uid=u49cfb849_1610292cf46__7f62&id