2020eko Uztailaren 8a | ± 01 min 39 s

EuskarAbentura 2.0 modura pasatzen da. Koronabirusak eragindako osasun krisia dela eta, aurten bere eskaintza egokitu behar izan du elkarteak. Hori dela eta, Instragramen bidez erronka lehiaketa bat proposatuko die 2001 eta 2005 urte bitartean sorturiko gazteei. Euskal Herriko zein diasporako gazteei zuzenduriko erronkak taldeka, euskaraz eta kanpoan egin beharko dira. Izena emateko epea zabalik da.

EuskarAbenturak bere Instagram kontuaren bidez zabalduko ditu erronkak astelehen, astearte eta asteazkenetan, astero, uztailaren 6tik aitzina. Talde bakoitzak erronka bidali beharko dio elkarteari aste bakoitzeko osteguna baino lehen. Irabazleen izenak uztailaren 30ean jakinen dira.

Astero, bi irabazle izanen dira eta sariak puntu gehien irabazi dituen taldeari bideratu dizkio elkarteak. Asteroko sariez gain, EuskarAbentura 2021 espedizioan parte hartzeko bi leku zozketatuko ditu. Bat adingabe batentzat parte hartzaile moduan izanen da eta beste bat adin nagusikoentzat, begirale-laguntzaile moduan.

Erronka kolektiboa

Halaber, erronka kolektibo bat antolatu du elkarteak, eta horren bidez Euskal Herria eta diaspora sinbolikoki lotu nahi ditu elkarteak. Hain zuzen ere Maule eta EuskarAbenturan parte hartu duten diasporako gazteen herriak lotu nahi ditu: "Washington (AEB), Estokolmo (Suedia) eta Viedma (Argentina)".

Horretarako, gazteei uztailean ibilaldiak egin eta Relieve aplikazioan gordetzeko eta Instagramera bidaltzeko gonbidapena luzatu die. Erronka zehatza Mauletik diasporako gazteengana dagoen distantzia betetzea da.

Iturria: https://www.kazeta.eus/