Euskaraz bizi #ustebainogehiagogirelako #leuskaraavecplaisir
Etxealditik atera daitezkeen irakaspenak
Bi hilabete pasa ditugu etxean, bakarrik, bizikideekin, familiarekin. Bakoitzak ahal bezala eraman du egoera, batzuk pausatu dira, besteak sukaldean hasi dira, beste batzuek euskara inoiz baino gehiago biziarazi dute haien etxean.
2020eko Maiatzaren 18a | ± 02 min 33 s
Guk 6 proposamen egin nahi dizkizugu, etxetik aterata ere, euskaraz bizitzen segitzeko.
1. Aldaketa etxean hasten da
Etxealditik Euskaraldira kanpainaren lema izan da:"€œohitura aldaketak etxean hasten diraâ€. Hizkuntza ohiturak aldatzea ez da erraza, baina ez da ezinezkoa. Lehenik azter ezazu familiako kideekin gehien erabiltzen duzun hizkuntza zein den. Horren arabera, hizkuntza hori aldatzeko edo finkatzeko erabakia har dezakezu. Etxekoei eginen diezun opari bat da euskara!
2.Lehen hitza euskaraz
Lehen hitza euskaraz egitea, ate bat irekitzea da. Atea irekitzen ahal diozu euskara inoiz entzun ez duen pertsona bati (eta agian interesa piztuko dion bati), euskara ikasten ari den bati, euskara betidanik dakienari. Okindegira, saltegira, farmaziara, ostatura... joatean, euskaraz agurtzen baduzu, sorpresa ederrak izan ditzakezu!
3. Euskal kultura sustengatu
Osasun krisi honen garaian, inoiz baino gehiago behar izan dugu kultura, konfinamendua goxatzen lagundu baitigu. Aldi berean, kultur sortzaile ainitz entzun ditugu haien egoeraren larritasuna azaltzen. Joan den apirilaren 21 eta 22an, horietako anitzek greba egin zuten. Kalitatezko liburuez, filmez, antzerkiez, musikaz gozatuz, euskal kulturaren alde lan egiten duen hori lagundu dezakegu.
4. Euskara jolasteko ere da
Euskara ez da soilik ikastetxeko hizkuntza bat. Euskarak bizitzako eremu guztietarako balio du: irri egiteko, jolasteko, haserretzeko, goxatzeko...
Garrantzitsua da, beraz, gure haurrek euskaraz jolas dezaten, euskarazko filmak eta marrazki bizidunak ikus ditzaten, euskarazko ipuinak irakur ditzaten...
5. Euskal hedabideetan informatu
Zein hizkuntzatan segitzen duzu aktualitatea? Eta zein formatutan? Oraindik paperezko prentsak etairratiak gutariko ainitz erakartzen dute, nahiz eta internet bidezko informazioa etengabe jasotzen dugun sare sozialetan. Bertako informazioa eta mundu osokoa, euskal hedabideetan topa dezakezu, euskaraz:
https://www.hedabideak.eus/?lang=fr
6. Transmititzeko beldurrik ez!
Osasun krisiaren garai honetan, elkarren arteko distantzia zaindu beharko dugu, kontaktu fisikoa saihestu, besarkadak eta pottak partekatzeko itxaron beharko dugu oraindik, ahoa maskara batekin estalia izanen dugu... Baina gure arteko loturetan bada zerbait ahoz aho eta mihiz mihi transmititzen segitu nahi duguna: euskara. Mugarik gabe, edonorekin, hurbilekoekin eta ezezagunekin partekatzekoa.
