BABk ere euskaraz bizi nahi du!
Mintzalasai-ren 7.edizioa joan den irailaren 30ean bukatu zen, Marion aintziran, familien besta herrikoi eta aldarrikatzaile handi batekin. Hilabete osoan zehar, tokiko 45 eragile mobilizatu dira eta euskara ezagutzeko eta praktikatzeko 75 hitzordu baino gehiago antolatu dituzte.
2018ko Urriaren 3a | ± 02 min 49 s
Marka guziak hautsi dituen edizioa
8650 parte-hartzaile izan dira (horietarik %38 haurrak eta %62 helduak) eta betetze-tasa %80,30-koa da, beraz bilana biziki positiboa da. Gertakari hau geroz eta finkatuago dago BAB eremuan eta hitzorduen arrakastak erakutsi digu hirietan ere euskaraz bizitzeko gogoa bizia dela.
Egitaraua geroz eta zabalagoa eta aberatsagoa da. Hitzordu guzietan garrantzia handia eman zaio euskara praktikatzeari: buraso-haur jardueretan, proiekzio-debateetan, ikusgarri handietan eta tailer txikietan, bisita gidatuetan, kulturen arteko topaketetan? Lortu dugu publiko ezberdinen artean zubiak eraikitzea.
Arrakasta partekatua
Mintzalasairen arrakastaren gibelean, urte osoan zehar euskara biziarazteko lanean ari diren elkarteak atzematen ditugu. Baita ekimena posible egiten duten laguntzaileak eta proiektua sustengatzen duten eragileak ere.
Bestalde, BAM dinamikak ere parte hartu du arrakasta honetan, berari esker, 2017ko azaroan BABko 800 hiztun hizkuntza-ohiturak aldatzearen garrantziaz ohartu baitziren.
10. urtebetetzerako, 10 000 parte-hartzaile!
2019an, Mintzalasaik lanean segituko du lurralde estrategiko eta garrantzitsu honetan, baina segurrenik beste data batean. Gogoeta hasia da eta 2018ko azaroaren 16an eginen den ezohiko biltzar nagusian aurkeztuko da.
Jarduera-ideia berri anitz ditugu geroz eta egitarau aberats eta berritzaileago bat eskaini ahal izateko. 3 urteko ziklo bat irekiko da, 2021era arte, euskara eremu urbanoan txertatzeko helburuarekin.
Euskara 365 egunez
Anartean, www.mintzalasai.eus webgunean urte osoan zehar, BABn, euskaraz egin daitezkeen aktibitateak atzematen ahalko dira. Izan ere, Mintzalasairen xedea da sartzeko parentesi bat izan ordez, urte osoan zehar euskarazko eskaintza iraunkorraren isla izatea. Eskaintza jadanik hor da: gure elkarteetan, mediateketan, eskoletan, gaztetxeetan, ikusgarri-geletan?
Egia da eskaintza oraindik ere azkartu behar dela, eta kolektibitateek rol garrantzitsua jokatu behar dutela. Baina hiztunok ere kontziente izan behar dugu ingurua aldatzeko gure gaitasunaz, jadanik badena biziaraziz eta eskaera indartsua adieraziz eskaintza garatzeko gisan.
Baina euskaraz bizitzeko lehen urratsa edozein egoeratan, edozein pertsonarekin lehen hitza beti-beti euskaraz egitea da. Horrela, euskara entzungo da, hizkuntza erabiltzeko eta besteekin partekatzeko borondatea ikusiko da, eta gainera, euskaraz mintzatzeko parada berriak deskubrituko ditugu.
Ondorioz, Mintzalasaik dei egiten die euskararen geroa segurtatu nahi dutenei, euskara dakitenei eta (oraindik) ez dakitenei, bere biziberritzearen alde lan egiten jarraitzeko. Norbanako gisa eta kolektibo gisa, gelditu gabe, fermuki eta positiboki.
Erronka handia da, baina lortzen ari gira!
