2020eko Irailaren 9a | ± 02 min 26 s

Mintzalasai jaialdiaren 9. edizioa prestatzen ari da duela zenbait hilabete orain. Uztailean, elkarteak lanean jarraitzea erabaki zuen, egoera sanitario goraberatsu eta Angeluko herriko etxea bezalako partaide batzuen gibel egiteagatik. Harrezkero, lan-batzordeak indartu dira, eta programa eder bat diseinatu dute.

Ez genuen hortara iritsi nahi.

Bururaino joan gira, baina ebidentziara jo behar da: ezin da hitzordurik proposatu, hiztunei euskaraz trukatzeko aukerak eskainiz giro lasaian. 2012. urteaz geroztik, euskara plazerarekin partekatzeko promesa betetzeko konpromisoa hartu dugu. Zoritxarrez, egungo klimak ez digu uzten promesa hau betetzen.

Beraz, Marion lakuan antolatutako jarduera guztiak (Ekiza eta Anariren kontzertuak, igandeko besta?) eta maskararen zati bat kendu behar dutenak (tailer gastronomikoak?) bertan behera uztea erabaki zen. Egitaraua hemen eskuragarri: https://mintzalasai.eus/ekimena/egitaraua

10 urte beteko ditugu!

2021ean, Mintzalasaik 10 urte beteko ditu. Ideia ero hori Miarritzeko euskara batzordean atera zenetik egindako bidea ederra da. Harro egon gaitezke betetako lanaz! Udako azken egunean hasi eta Hizkuntzen Europako Egunarekin amaitu behar lukeen jaialdi bat antolatzen ari gara (2021eko irailaren 20tik 26ra). Ausardia, berrikuntza eta kolektiboa ardatz dituen euskararen astea.

Proiektuen deialdia egingo da lurraldeko elkarteentzat. Aldi berean, duela egun batzuk lan bat hasi zen erakundeekin eredu ekonomiko iraunkor bat eraikitzeko (EEP, Elkargo, EKE).

Besarkatzeko gogoa dugu

Konfinamenduak erakutsi du euskarari eskainitako espazioak zenbateraino diren hauskorrak: haurrentzat, euskara eskolan giltzapetuegi dago oraindik. Euskaldungaientzat, euskara konplexurik gabe praktikatzeko aukerak sobera eskasak dira oraindik. Euskaldunentzat, euskaraz bizitzeko eskubidea gehiegi ukatzen da.

Euskararen inguruan batzeko beharra dugu. Bateratu eta boteretu. Krisi horrek sortzen duen beldur eta mesfidantzaz askatu behar dugu. Eta aitzinatu, beti. Baimenik itxoin gabe, gure ardura delegatu gabe. Hemen eta orain, aitzinatu. Pixkor, baikor eta burugogor.

Azken hitza orain arte bidelagun izan ditugun guziak eskertzeko:

• Komisioetako laguntzaileak,
• Lurraldeko elkarteak,
• Partaide instituzionalak (Miarritze, Baiona, Elkargoa, EEP, EKE),
• Iragarki erosleak.

Orain, Euskaraldia dator. Beste transmisio bat posible da!