2020eko Abenduaren 11a | ± 04 min 43 s

Entzun Mari Domingi eta Olentzeroren mezua:

https://youtu.be/pkwPWHztBLw

Elkarrizketa:

Zertan ari zarete hemen, menditik urrun, egun hauetan?

Mari Domingi: Azken hilabeteetan zerbait berezi gertatzen zela sendi genuen. Herri eta hirietatik zetozen hotsak entzunez jakin dugu birus ttipi ttipi batengatik, jendea etxetan egona zela eta maskaturik ateratzen zela.

Olentzero: Ezin sinetsirik, egoera zertan den ikustera jin gira. Eguberri prestatzen hasi gira, beraz Euskal Herria zertan den jakin nahi ginuen.

Nola pasa duzue urte berezi hau mendian?

M.G: Udaberri eta udazken honetan mendizale gutti entzun ditugu, arrabots gutti entzuten zen. Baina ez zen bizi faltarik! Natura lasaiagoa zen, animaleak guttiago beldurtzen ziren eta guk gehiago ikusten genituen! Udan aldiz, jende anitz etorri da, jendeak airea hartzeko beharra zuela nabaritzen zen!

O: Herrietatik jendearen kezkak entzuten ditugu baina lorpenak ere ikusi ditugu. Etxeetan hetsirik eta zailtasunetan izan dira batzu, beste batzuk aldiz eguneroko zurrunbilotik atera eta lasaitzea lortu dute, gauzak denborarekin eginez, familian denbora pasatuz eta batzutan leihotik xoriak hegan ikusiz, sinpleki.

Olentzero, ikatza egin ahal izan duzu betiko moduan, sua pizteko?

Olentzero: Bistan dena! Jo ta ke ibili naiz lanean eta aurten beste urteetan baino ikatzgehiago prestatu dut?argi beharretan izanen direla herritarrak uste dut. Etxe batzuetan bazterrak berotzeko beharra senditzen da. Txondor berriak egin behar izan ditut eta zuhaitz batzu landatu ere. Oihana ez baita hustu behar!

Eta haurren opari eta beste eskaerak betiko moduan iristen ari dira aurten mendi aldera?

Mari Domingi: Bai hasi dira lehen nahiak iristen. Manera ezberdinak badira horiek helarazteko, mendira oihu eginez, hitzak eta marrazkiak ate aitzinetan ezarriz, ikastolan utziz, idatziz, edo beste mila manera. Segur izan mezu guztiak iritsiko direla. Ondotik Olentzerori emanen dizkiot behar den guzia presta dezan.

Eta eguberri gaua prestatzeko lanak aitzina doaz?

Olentzero: Urte guziz bezela abenduan herriko giroa sentitzen hasten gira eta orduan hasten gira. Ttuku-ttuku prestaketak aintzina doaz.

Lortuko duzue aurten ere eskaera guztiak betetzen?

Mari Domingi: Ez ote dugu urte guziz lortzen? Jo ta ke lanean ibiltzen gira haur guziei poza eta zoriona banatzeko. Eta aurten ere hemen gira.

Olentzero: Ez da langabezirik guretzat. Aurten ere herri, etxe eta eskoletatik pasako gira. Batzutan ikusiko gaituzue, beste batzutan, entzunen, sentituko edo gure aztarnak atxemanen dituzue. Gu bionak eta astoarenak ere seguraski!! Segur izan aurten ere Euskal Herriko zoko guzietatik pasako girela.

Eguberri ate joka dugunean, hainbat herritan egiten ohi duzuen bisita ezingo da gertatu aurten....

Olentzero: Egia da, aurten herrietan eta eskoletan bisitak ezberdinak isilagoak izan daitezke, gutti agertuz. Ohiko ibilaldiak ezingo dira antolatu leku anitzetan. Zuek begiak zorroztu, beharriak luza eta gure berri izanen duzue.

Mari Domingi: Aurten naturari eta ingurumenari kasu egin beharko diozue gure berri ukaiteko. Aztarna batek edo xori baten txioek gure berri eman deikezuee. Mintzalasaikoek ez al duzue gure etorreraren berri ukan? Xoriak kalakari ederrak dira, aski izaten da entzuten jakitea.

Urte hau ongi bukatzeko eta 2021 urteari ongi etorria egiteko, mezu berezirik baduzue haurrentzako eta familia guztientzako?

Mari Domingi: Pentsatzen dugu aurten beste urteetan baino gehiago jendea ohartu dela inguratzen gaituzten bizidun guzien garrantziaz. Arbol, xori, mariorratz, erle? gure erreinua osatzen duten izaki eta landarerik gabe, bizirik ezin dela izan. Aurten beste urteetan baino gehiago jendea ohartu da, gure inguruan dauden pertsonen artean elkar laguntzari esker baizik aitzina gaitezkeela. Aurten jendea ohartu da biziak eta askatasunak ez duela preziorik. Beraz aurten beste urteetan baino gehiago, zaindu maite duzun hori!

Olentzero: Egun ilunen ondotik beti eguzkia itzultzen da. Hori da gure mezua eta urte guziz azkarki kantatu nahi duguna.