2021eko Agorrilaren 27a | | ± 05 min 28 s

Nondik hasiko dugu Cazenave txokolateen laborategiaren bisita?

Txokolatea egiteko lehen etapatik hasiko gara. Alegia nazioartetik zaku handi horietan ekartzen ditugun kakao babak tresna zahar eta handi honetan sartzen ditugu erregosteko.

Jakin behar da Cazenave etxean, etapa guztiak hemen egiten ditugula. Kakao aleak ekartzen ditugu eta txokolate dendara doazen gozoak ateratzen dira hemendik. Nahasketa guztiak, pralina ere hementxe prestatzen dugu guztia. Ni lehen etapez arduratzen naiz, kakao aleak erregosteaz eta hasierako nahasketez, azukre esne eta abarrekin txokolate mota ezberdinak bihurtzeko. Ondotik gure etxeko txokolate egileek bonboiak prestatzen dituzte. Ekoizpen arduraduna naizenez, ordenagailuaren aitzineko beste lan batzuk egin behar ditut bestalde.

Arnoaren Mekan sortu eta txokolate egile bihurtu zara. Kontatu zure ibilbidea.

Ni ez naiz hemengoa, Bordele aldekoa naiz. Ikasten ari nintzela, Joana, nire neska laguna ezagutu nuen Bordelen. Haien burasoak dira Cazenave etxeko jabeak, 1934az geroztik, amatxik Baionako txokolategi ospetsua erosi zuenetik. Garaian DUT titulua lortu nuen animazioan baina laster Euskal Herrira etortzeko erabakia hartu genuen. Lapurdira iristean Joana dentista gisa hasi zen lanean eta haren familiak txokolategian lan egiteko gogoa nuenez galdetu zidan. Lehenik Baiona hiri erdiko kafetegian hasi nintzen, zerbitzari eta langile gisa, gero CAP formakuntza egin nuen txokolategian eta titulua lortzean hasi nintzen laborategian, produkzio lanetan. Gero egiten dudan lanaren parte handi bat hemen bertan ikasi dut besteak behatuz. Horrez gain, formakuntza bat egin nuen enpresa kudeaketa ikasteko, izan ere mundu hori ez nuen batere ezagutzen. Eta ber denboran euskara ikasten hasi nintzen.

Zer izan da zailena, euskara edo txokolatea egiten ikastea?

Lehenik erran behar dut betidanik biziki txarra izan naizela hizkuntzak ikasten, ingelesa edo espainola kurtsoetan, ez nintzen batere azkarra. Aldiz euskararekin harritua egon naiz nola ikasi dudan eta ez naiz harritu den bakarra izan.

Orain bi hizkuntza dakizkit eta ingelesez galdetzen didatenean, euskaraz erantzuten dut.

Niretzat euskara ikastea normala izan da, izan ere, Joana euskaraz ari da lagunekin, familiarekin, orduan erran dezaket murgiltze eredua eduki dudala etxean. Hemengo hizkuntza jakitea inportantea zen Joanaren familiarentzat eta niretzat ere. Horri esker elkarrizketa hau euskaraz egiten ahal dut, familiarekin euskaraz ari naiz eta ukan ditugun bi haurrekin euskaraz mintzo naiz eta biziki pozik nago.

Bordeleko familiak zer dio?

Nire familia harritua gelditu da. Euskal Telebistan maiz egin dizkigute elkarrizketak eta euskaraz erantzuten ikusi nautenean harrituak gelditu dira. Gero ongi ikusten naute orduan denak pozik.

Zenbat kilo hartu zenituen Cazenaven sartzean?

Egia da kilo batzuk hartu nituela baina beharrik Euskal Herrian kirola ainitz egiten dugun, surfa, mendia eta abar, orduan oreka bat lortzen dut orain. Bestalde, hastapenean txokolate purua hartzen nuen %100ekoa kasu egiteko... Baina orain denak probatzen ditut segurtatzeko eta denak ongi sartzen dira.

Zein da euskaraz gustura ari zaren lekua?

Gure lagunekin eta gure alaben ikastolan Kanbon indar berezia egiten dugu euskaraz aritzeko eta gustura ari naiz bertan. Lanean ere, egiten dugun txokolate biologikoa denda ezberdinetan banatzen dugu eta itzulia egitean, euskaraz aritzeko parada dut hainbat saltzailerekin.

Lanean euskaraz aritzea plazer bat da ere bai. Baionako saltegi-kafetegian ere bezero euskaldun asko dira eta plazer bat da horiekin euskaraz aritzea.

Gorroto duzuna?

Ez dut maite bustia egotea, eta horretaz ez dut maite arazo baten aitzinean aterabiderik ez edukitzea. Hori gorroto dut. Bestela bizian ez naiz askotan haserretzen.

Maite duzuna?

Denbora ukaitea maite dut, hori da enetako inportanteena, gauzak fite egitea gorroto dut.

Bestalde, asko maite dut sukaldatzea, egunero sukaldatzen dut eta maite dut. Astero Garro saskia erosten dugu eta sukaldean zinezko plazera hartzen dut barazki fresko horiekin errezetak asmatzen. Ez dut errezeta konkreturik segitzen inoiz, tipularekin hasten naiz eta gero inspirazioaren araberako platerak prestatzen ditut gustura.

Garroko barazkiak txokolatearekin probatu dituzu?

Ez, momentuz ez naiz ausartu errezetarik probatzen baina zertako ez? Mexikon adibidez mole izeneko platera dago, oilasko eta txokolatez egina. Orduan zertako ez barazkiekin probatu noizbait?

Lanetik kanpo zertan pasatzen duzu denbora?

Momentu honetan, haurrekin denbora anitz pasatzen saiatzen naiz. Bestela kirola egiten dut, mendira goaz, lasterka egiten dut, igerika eta abar... Gero sukaldatzen dut eta nahi nuke baratze bat sortu ere, baina momentuz ez dut denborarik. Proiektuak utzi behar dira ere geroko.

Aurrekora Hurrengora