2021eko Agorrilaren 3a | | ± 01 min 55 s

Eragile anitz mugitzen dira euskararen biziberritzearen inguruan, baina tailer honetan hainbat galdera pausatzen ziren: elkar ezagutzen al dute? Nola egikaritu herri mugimendua eta administrazio publikoen arteko lankidetzak? Zein dira lankidetzarako espazioak? Zer dira gure beharrak?

Garikoitz Goikoetxea Uemako teknikaria gomitatu zuten euskalgintzaren mapa aurkeztera, baita Jon Sarasua Mondragon Unibertsitateko ikerlaria ere, euskalgintzak ondoko urteei begia izan ditzakeen erronkez dituen gogoeten partekatzera.

Garikoitzek Euskal Herri guziko euskalgintzaren mapa bat proposatu zuen: erakundeak, akademiak, elkarteak. Instituzioen eta herri mugimenduen arteko lankidetzaren beharra azpimarratu du, baita euskalgintzako eragile desberdinen arteko elkarlanarena ere.

Jon Sarasuak, berriz, euskararen biziberritzearen istorioa kontatu zuen, azken 60 urteetan eginak izan diren aitzinamenduak aipatuz. Aitzineko belaunaldiak amets bat izan zuela dio, seme-alabak mundu "modernoan" euskaraz bizitzea eta horretarako tresnak sortu zituzten: euskararen korpusa"€”euskara batua eta garapen terminologikoa—, ikastolak eta hezkuntza, hedabideak, kulturgintza, administrazioa eta lan eremuaren euskalduntzea? Egitura oso bat; zuhaitz bat marraztuz itxuratu zuena. Hastapen batean, lan guzi hori instituzioen laguntzarik gabe egin zen, eta gaur egun, bi oinen gainean atxikitzen du: soziala eta instituzionala.

Egin den lan handiak egoera lagundu badu ere, hiztun komunitate eri bat gareladio Sarasuak. Erronka garrantzitsu bat, euskararen atxikimendua berpizteko kontakizun bihotz-altxagarri eta azkarra pentsatzea da bere ustez, gazteak ere lanari lotzeko.

"Motibazioa elikatzea izango da ondoko urteetako giltza".

Lehen saio hau, 9 hilabete iraungo duen gogoeta ziklo baten parte da. Ondoko saioak irailean Mintzalasai festibala kari eta azaroan Euskararen urtaroa kari eginen dira.